جیب تئلفونوم
جیب تئلفونوما یازیغیم گلیر
تامارزی قالیب دیر مئسئژ لرینه
بیرده , پاییز قوخولو , غزل هوس لی ,
او مغرور ، بیر آزدا دوغما ،
سئویملی سسینه
جیب تئلفونوما یازیغیم گلیر
چوخداندیر تلسمه ییرم اونو یئردن گؤتورمه یه
جیبیمدن چیخارماغا
چیرکین سس سیزلیینی سیندیرماغا ...
تامارزی قالیب -
-آدینلا آدیمی منیم چون چاغیرماغا.
آخی بیر زامان هئچ سوسمازدی او .
منه شعر آنلاداردی،
سئوگی هاواسییلا ماهنی اوخویاردی...
گاهدان آغلاردی
منله،
سنله،
تکجه محرم ایدی هؤنکورتوموزه
و
سس سیزجه اوره ییمیز گلمه دن آغلاماغیمیزا.
چوخداندیر چوخ ایشلر اولور،
چوخداندیر چوخ ایشلر اولمور.
یازیق جیب تئلفونوم!..
یازیق...
*
بیر آخشام چاغی ایدی،
-:یاغیشلی آخشام.
تبریزین نم هانسی قبریستانی ایدی
"سانکی محشرین بیرینجی گونو"
هامی خورتلامیشدی
گؤز یاشلاریملا یویونوردو یاغیش...
دیرین ...
دیرین ...
دیریلین !
چالیندی اسرافیل شئیپورو بیردن...
اؤلولر دیریلمیشدی اؤنجه دن
چیخاریب جیبیمدن تئلفونومو
بیر مئسئژ گلمیشدی
قیل کؤرپوسوندن!:
سؤزجوکلر تانیش دی
" آقای قضائی
نروین ...
نروین ...
نروین ... "
بو سؤزه دؤزمه دی یازیق تئلفونوم،
بعلی ,
دؤزمه دی !!!
توکندی قراری،
قورتولدو شارژِی،
تبریزین نم هانسی قبریستانی ایدی .
من اؤلدوم محشرین اوّل گونونده !
*
سحر چاغی ایدی ...
بو دفعه بانلادی جیب تئلفونوم
دؤیوشه چاغیردی،
-خوروز دؤیوشو ...-
" دونیادا بوتون قانلی حربلرین آرخاسیندا بیر قادین دوروب حؤکماً "
- بو سؤزو اذان وئریب قولاغیما تاریخ
... هه !
همن مکتب چاغلاریندا ایتیردیییم
و هئچ دوشونمه دیییم کتاب
کئشگه بونو درسلیک کیمی بؤیوکلوکده اوخویاردی حؤکمدارلار .
هله گیزلن - پالانج اوینایان اوشاقلارا نه گره کدیر ,
فاتحلرین ایچی بوش تاجلاری نین آلتیندا کی
گیزلین لری آراماق؟!
واراقلاریندان اوچاق قاییریب
گؤیده اوچدورماق هوسی ...
- بودور تاریخ درسی -
ساسانی لر , اشکانی لر
هارادان باشلانیب ؟
هارادا بیتر ؟
مازالاق بیتیرلر بئینیمده سلسله لر
یئتر.. یئتر !
" دونیا اؤزو فیرلانیر کی بیلینمه سین اؤنو- سونو !"
... هه ! دئییردیم آخی !
ایتیرمیشدیم کتابیمی
بیرده کی منی دؤیوشه چاغیریردی بیر قیز !
آمان !
آمان !
آمان بو دؤیوشدن ...
" یوخ قیزیم ! اوشاقسان بیلمه سن هله !"
اولماق - اولماماق -
اودماق - اودوزماق -
آچیلیب منه
گولـله سیز توپانچایلا دوئله گئتمک ,!
- بودور مسئله -
سونرا ..
دیرین...
دیرین ...
دیریلین ....
خورتلاییر پوشکین !!
بودور فلسفه.
سن , " چتین " دئییلسن گولوم ؛
" چتین " منم ,
قوی دئییم نییه؟!:
- نئچه ایل اؤنجه دئدیییم شعرلرله،
آلدادیرلار قیزلاری
کافی نئت لرده
چت لرده،
شعرلریمی مئسئژ یازیرلار سئوگیلی لره-
گؤزه للره...
منسه بو یاشدا
بو دورومادا
چکیلیرم کؤلگه دن گونه.
عؤمرومون گون اورتا چاغیندایام...
بیر آز دوز سپیرسن اووجوما...
افطار ائده جک ووردوغون یارالار...
عؤمرومون آخشام چاغیندا
ایندی هله
قوی یانسین اوره ییم
قورد کیمی اولایان
جیب تئلفونوما...!!!
یازیق جیب تئلفونوم...آخ ،...
یازیق...
( محمد قضائی )
