پاییزیم

بو گون پاییزیمین سونونجو گونو

قورتولدو پاییزیم ، اؤتدو پاییزیم

خبرسیز گئتمه دی بو آخشام اوستو .

گؤروشدو ، اوزومدن اؤپدو پاییزیم

 

هله سایمامیشام جوجه لریمی

من سن سیز بو قیشا چیخا بیلمه رم

گئدیرسن ، من ایسه یئتیم غمیمی

آتالیق قوینونا آلا بیلمه رم

 

دئیه سن آچیلیر توتولموش دیلیم

گؤزومدن ، تؤکولور سؤزلریم – یازیم

الهی بو گئجه لاپ سن دئیه نم ،

قوی گئدیم تک قالار یازایق پاییزیم

 

سن گئتدین ، یئرینه گلن قوناغین،

قارپیزلار کسیلیر آیاغی آلتدا !

داریخما کسرم حیاتین باشین ،

قاییدان گونونو گؤرسم بیر داها .

 

آی منیم وارلیغیم ، شئعریم ، ایلهامیم

بیر کیمسه بیلمه دی سنین قدرینی .

آی! وطن اوره کلیم ، آی! شئعر دیلیم،

باشینا دولانیم ، آلیم دردینی.