* ياس ايچينده توي *
* شاهمار اکبرزاده
نعشي عومورـ گون يولداشينا
قوووشان «موشگوناز» خانيمين خاطره سينه
جاويده قوووشان نعشينه قوربان!
بو بخته ايلاهي پاي دئييرَم من.
مني باغيشلاسين اوجا يارادان،
بو دفعه د فنينه توي دئييرَم من.
*
بو دفنه ياس دئسـَم، يانار اورَييم،
سئوينجيم غميمله بيرآشيب ـ داشير.
ايلاهي، بس نئجه فرحلنمـَـييم،
جاويدين تورپاغي موشگونازلاشير.
*
تابوتو او دلاردان اود آلان َملك،
وصال كؤرپوسوندن بيرده كئچيرسن.
كجاوهن مبارك، تويون مبارك،
مزاردان مزارا گلين كؤچورسن!
*
قان قانا قوووشان گون دئييل بوگون،
سيبيرده ايچيلدي قاني جاويدين.
تويودور سورگونده دونان سومويون،
بو گون آچيلاجاق دونو جاويدين!
*
ايبليسلر باش يئدي اوتوزيئددي ده.
زمانه جلّادا دؤندو نه دؤندو
اَينينه گئيد يگين پالتار اووعده
قورخودان آغاريب كفنه دؤندو.
*
باشلانير ابدي تويون قرآنلا
يامان هاوالانيب ايچيمده درديم.
آللاه باغيشالاسا، باجيم تورانلا
قبرينين باشيندا قول گؤتوَررديم.
*
تابوتو او دلاردان اود آلان ملك.
وصال كؤرپوسوندن بيرده كئچيرسن.
كجاوه ن مبارك، تويون مبارك،
مزاردان، مزارا گلين كؤچورسن!
___________________
شیمشک بالیق
* حسن اومود اوغلو
صمد بهرنگی نین اولو روحونا ایتحاف
اوزانیب دنیزین ماوی یاخاسین
ییرتیب پارچالادی «تیلوو»لو ال لر
سالیب توزاغینا بیر نئچه بالیق
دنیزی ترک ائتدی او «لوو»لو ال لر
دنیز هارای چکدی بالیقلار اوچون
دالغالی ساچینی یولدو آنا تک
بیر آزدان باغیرتی چکیب آغلادی
آنا آرخاسینا باخان بالا تک
دنیز هارایینا چاتمادی بیر «هوو»
سانکی قورد یئمیشدی شنگیلی سینی
تپه – گوز ال لری قان – قان دئیه رک
آپارمیشدی اونون سئوگیلی سینی
سئوگیلی بالیقلار چالیشدی مودام
قورتولوش اولمادی قورشون قیییناقدان
دوستاق بالیقلارین پوزقون حالینا
گؤیلر قان آغلادی قیزیل شافاقدان
شن سولار باغریندا چاخناشان بالیق
آیریلدی قوینوندان بوللور دنیزین
فلک له یئسیرلیک ال – بیر اولاراق
سارالتدی بالیغین گوموش بنیزین
بیر نئچه قارا گون اؤتوب کئچدیکده
ساتاغا یوللاندی دوستاق بالیقلار
آلینیب یاتیلدی سانکی بیر ماتاح
دنیزین گؤزوندن اوزاق بالیقلار
بیر نئچه قارا گون اؤتوب کئچدیکده
ساتاغا یوللاندی دوستاق بالیقلار
آلینیب ساتیلدی سانکی بیر ماتاح
دنیزین گؤزوندن اوزاق بالیقلار
شوشه قفس لری سوسلمک اوچون
مرمر سارایلارا گئتدی بالیقلار
کیمی سی ال اوزوب آنا دنیزدن
کیمی سی ال اؤزوندن – ایتدی بالیقلار
لاکین شیمشک بالیق دایانمایارق
دنیز هوسینده آلیشدی آنجاق
بالیقلار دنیزه گرکدیر دئیه
شوشه قفسینده چالیشدی آنجاق
او دنیز ائولادی دلی بالیقلار
او دئییل بیر چیمدیک یئمک بالیغی
مگر سیغینارمی شوشه قفسه
ایپک دنیزلرین شیمشک بالیغی ؟
بالیقا دیکیلن سویوق باخیشلار
ال – الوان رنگینه آلقیش دئییردی
بالیق ایکی اوزلو شوشه یه مودام
اورکده ابدی قارقیش دئییردی
باخیردی آینالی قورخونج گؤزلره
کیپریکلر بارمالیق ، ببکلر زیندان
گؤرکن شکلینی قارا گوزگوده
چیرپینیب قورتولوش ایستیردی هر آن
چیرپینان بالیغین گوموش گؤوده سین
بیچیب یارالادی شوشه قفسی
قانلی بیر گؤوده یه دؤنموشدو یئری
چیرپینیب چاغلادی وارکن نفسی
دئدی قوی بویانسین قانیما سولار!
اوره کده قالماسین آرزیم ، هاراییم
چایلارین قوینوندا دنیزه قدر
چاتاجاقدیر منیم حورریت – هاییم
بو گون من اؤلسم ده یاشاسین دنیز
قان – قیرمیز اؤلومو آلقیش لاییرام
ذلتله یاشاماق نه یه گرکدیر ؟
بئله بیر حایاتی قارقیش لاییرام
چالیشیب دالغایا گتیردی سویو
چاغلاییب صبرینین چاناغی داشدی
«بالیق سودا اؤلسه میرداردیر» دئیه؛
شوشه دوواریندان غئیرتله آشدی
چالیشیب حورریت دیلک یولوندا
دنیز سئوگی سیله قان وئردی بالیق
خالینین آل – قیرمیز بیر بوداغیندا
سانکی ناخیش اولوب جان وئردی بالیق
او قوزقون باخیشلی قورغوشون ال لر
ایلغیم گؤلگه سینی بالیغا سالدی
بالیغی آتارکن آرخین سویونا
سولار ائولادینی قو ینونا آلدی
«موشتولوق وئرمه یه» اوچوب قاغایی
«گؤز آیدین» دئمه یه گلیردی آغلار
«باش ساغلیق» وئرمه یه چایلار تله سیب
قارا کؤینه یینی گئیمیشدی داغلار
یوللار اوزانیردی شیرین – یوخو تک
آنجاق دایانمادی هفته لر آیلار
گتیریب چیخارتدی آنا دنیزه ،
دالغا تابوتوندا بالیغی چایلار
باسیب اؤز باغرینا یورقون بالاسین
هؤنکوروب ، چاغلاییب ، آغلادی دنیز
بولودلو گؤیلری درده گتیریب
یانقیلی اوره یین داغلادی دنیز
گؤیلرسه پوسگوروب وولقان لار کیمی
بولودلار شیمشک لر گورشاد چاغلادی
بو گئجه صوبحه دک یاغیش یئرینه
گؤیلر دنیز اوچون بالیق آغلادی
ــــــــــــــــــــــــــــــــــــــــــــــــــــــــــ
* محمد قضایی
گؤزونو بیرجه یول آچدینسا منه
سانکی بیر عؤمرون چیسکین عذابی
او سون باخیشیندا یاغدی اوزومه.
قورویوب آغیر بیر هیکله دؤندوم
دالدیم گؤزلرینین ده رینلییینه
اون – آلتی یاشینین تهله که لری
بیر آ ندا جالاندی چییین لریمه
بیلمیرم سن ایدین یوخسا گوناهین
دؤیدو اوره ییمین تاختا قاپی سین
«قاپ دؤین » دئمه یه قالخدیم آیاغا
بیر اوشاق دایانیب قاپی دالیندا
الینده اون – آلتی اؤلومجول چیچک
«بونلاری اوخوماق ایستیرم»، دئیه
وئردی ال لریمه او چیچک لری
باخدیمسا اوشاغی گؤرمه دیم داها
نه قدر آختاردیم یوخودو اوشاق
نه بیلیم بلکه ده او چیچک لری
مینم طالعیمده اوخودو اوشاق
*
سنین طالعینده اوشاق کیمی ایدی
معصوم – بویاسیز ،
گؤزلرین دانیشان ناغیل کیمی ایدی
اون – آلتی چیچه یین اون – آلتی ایلی
هر چیچک بیر ایلین خاطیره سی ایدی
سن اؤز عذابینی – اؤز حسرتینی
هئچ اسیرگه مه دین بو چیچک لره
چیلپاق آغاج لارین اوره ک قانیله
دویوردون بو کؤرپه خاطیره لری
*
ایندیسه کؤچورم ، کؤچورم سندن
گئدیرم زامان سرحدلرینه
بیر طرفده سن – سن ؛ بیر طرفده من
بیتیر قارشیمیزدا بیر عؤمور نیسگیل
اَل چاتماز الوروق بیر- بیریمیزه
آه....
ایندی نه دئییم؟ ، نه دئییم؟ نه لر !
او سون باخیشی نین آغیرلیغینی
مندن سونرا بو گون کیم چکه بیلر ؟
سن منه باخدیقدا من جومدوم سنه
سانکی بیر دسته گول سونولدوم سنه
منیم چون دوغمایدی سنین ال لرین
منده چیرپینیردی سئوینجین ، غمین
منده چاغلاییردی هیجان لارین
بو گون سن گئدیرسن ، لچه ییمده دیر
دوداغیندان قالان سئوگی ایزلری
هئچ آغلاماییرام ، گؤزلریم کیمی!
کدرلی دئییلم اوره ییم کیمی !
هله سولمامیشام نیفرت بویاقلی
پاییزدان آسیلان طالعیم کیمی !
تبریز – 6/4/78
