«شعر» اوشاقلیغین گوناهی دیر.
الکساندر پوشکین
*انسان کؤلگه سی
او گؤرکملی بولودلار،
او هئیکل لی بولودلار،
ندن اوشاقلانیرلار؟
گاه باریشیب، اویناییب،
گاهداندا ساواشیرلار.
اونلار آتیشان زامان،
شیرها شیر یاغیش یاغیر.
بیر بؤیوک بولود ووروب،
بیر بالانی آغلادیر.
اودور- هؤنکورور دنیز..
اودور- چاغلاییر سولار..
ائله اونا گؤره ده،
چاخناشیر ایلدیریملار.
***
بیر اوشاق آغلایاندا
دونیا ترسه فیرلانیر.
کائینات آجیقلانیر.
او گؤرکملی بولودلار،
او هئیکل لی بولودلار،
داغیلیب یوخ اولورلار.
اونلارین کؤلگه لری،
یئر اوزونده دایانمیر.
آنجاق اینسان کؤلگه سی
زامان بویو اوزانیر،
یئرده ابدی قالیر......!
*قارها..قارها..قار
یئنه بیر قوجا قارغا،
آغاج اوسته قاریلدیر.
گؤزلری شَوه کیمی،
گون ووردوقجا پاریلدیر.
*
بؤیوک آنام دئییری
قارغا خبر گتیریب.
دینمه یین،دانیشمایین
گؤره ک نه لر گتیریب؟
دئییرم آخی آنا
قارغا کی دیل آنلامیر.
قارها قار سسی والله
هئچ نه یی یادا سالمیر.
*
دئدی یوخ! سن بیلمیسن،
قارها ، قارها ، قارها ، قار.
اگر دوزگون ائشیدسن،
دئمک اوچون سؤزو وار.
*
اوندا بس، بؤیوک آنا،...
دونیادا مینلر قارغا،...
سسین آتیب باشینا،...
قارها ، قارها ، قارها ، قار-
دوغرودان کی اوشاقلار
بو گونده،
بو ساحاتدا،
گؤرون نه قدر سؤز وار
بیزیم بو دونیامیزدا؟....
*پالچیق فیشاسی
سلام،اوشاقلار سلام،
منی تانیرسینیزمی؟
من پالچیق فیشقاسی یام.
ایلین سون چرشنبه سی
گلرم بازارا من،
آتانیز آلار منی..
بوینوزا سالار منی..
سیز منی هئی چالارسیز.
یئر-گؤیه سس سالارسیز.
ائله منیمده آرزیم،
بودور دونیادا یالنیز!
نه گوجونوز واردیسا،
پیله یین بوغازیما..
سس سالین کوچه لره..
*
چالین، بوتون وارلیغیز،
سس اولسون،هارای اولسون.
قویون کوچه لرینیز،
منیم سسیمله دولسون!
